Пастдарғом туманидаги Самарқанд ихтисослаштирилган санъат мактаб-интернатининг икки нафар ўқувчиси масофали болалар халқаро танловларида иштирок этиб, ўз талантини намойиш этди. Жумладан, Оғабек Қосимов Москва шаҳрида ўтказилган "Ёш қобилиятлар 2020" халқаро болалар ижодий кўрик-танловида тасвирий санъат йўналиши бўйича Ўзбекистон халқ рассоми Баҳодир Жалоловнинг портретини чизиб, "Рассомчилик қобилияти" номинацияси бўйича фахрли 1-ўринни қўлга киритди. Шунингдек, Москва шаҳрида ўтказилган "Кладовая талантов" халқаро ижодкор ёшлар кўрик-танловида Шуҳрат Илмўминов "Очлик" мавзусидаги ҳайкалтарошлик ижодий иши билан иштирок этиб, танловнинг амалий санъат йўналишида ғолибликни қўлга киритди.